جامعة اليرموك الخاصة ypu

جامعة اليرموك الخاصة YPU
هي عبارة عن جامعة خاصة مقرّها اتستراد درعا(غباغب) قبل آخر جامعة (بعيدة نوعاً ما)
بالبداية هي جامعة تعتمد نظام الساعات


تشمل الكليات التالية:
1 صيدلة(هالفرع جديد عنا بالجامعة افتتحوه 2022)
2 هندسة معلوماتية والإتصالات
3 الهندسة المدنية
4 الهندسة المعمارية
5 الهندسة المعمارية الداخلية(ديكور)
6 العلوم الإدارية والمالية(إدارة أعمال )
بالنسبة لطريقة الدراسة بالجامعة
الدراسة بالافرع اغلبها بالعربي مع وجود بعض المواد باللغة الإنجليزية
طبعا السلايدات يلي مندرس منها بتكون بالانكليزي
المحاضرات بتكون بالعربي (في بعض المصطلحات بتنحكى بالانكليزي)
النظام المعتمد باليرموك هو نظام الساعات (طبعا للتوضيح انو الساعة مو يعني المادة، في مواد بتكون عبارة عن 4 ساعات وفي مواد اقل وفي مواد اكتر هالشي بيتحدد حسب ضخامة المادة واهميتها بالنسبة للفرع يلي دخلتوه)
بالنسبة لشرح نظام الساعات:مثلا عنا كلية هندسة المعلوماتية والإتصالات 168 ساعة خلال ال5 سنين دراسة
فكل فصل لازم ننزل 17 ساعة (بالسنة 34)طبعا هالحكي مو معناه انو منداوم 17 ساعة لا ابدا
لما منقول هي المادة مثلا 3 ساعات معناها انت كل اسبوع بتداوم لهالمادة 3 ساعات
معناها هال17 ساعة هنن عدد الساعات اللي بدك تحضرهن بالأسبوع
بس وقت الدفع فبتدفع لعدد ساعات المادة الوحدة (مثلاً في مادة 3 ساعات وعل ساعة 60ألف فبتدفع لهي المادة بالفصل كلو 180ألف

ومنجي هلق للامتحانات
عنا شي اسمو ميد(Med)يعني بمثابة امتحان نصفي للفصل الواحد واغلب المواد بتكون علامة الميد من 20
وشي تاني اسمو فاينل (Fainal)هو امتحان نهائي للمادة بتكون علامتو من 50 وعليه التركيز طبعا
وخلال الفصل بيكون في شي اسمو كويزات كل كويز بتكون علامتو يا 5 يا 6 عحسب الدكتور
هالحكي بينطبق عل مواد النظرية والمواد العملية بس بيختلف توزيع العلامات طبعا من مادة لمادة ومن دكتور لدكتور
بالنسبة لسعر الساعات وقسط الجامعة ف بيضل ثابت عحسب السنة يلي سجلت فيها (انا طالبة سنة تانية سجلت ب2021 كانت سعر الساعة ب 60 ألف بضل طول هالخمس سنين بدفع سعر الساعة 60 الف يعني قوانين زيادة سعر الساعات ما بيشملني)
في شي اسمو متطلبات وهي عبارة عن مواد مختلفة (إما بتكون لكل الافرع وهي اسما متطلبات جمعة او بتكون لفرع واحد وهي اسما متطلبات كلية)
متل العربي، الحضارة العربية الاسلامية، مهارات حاسوب، تاريخ، مدخل إلى الاقتصاد، إلخ.....
متطلبات الجامعة بيكون في 6 اختيارية و9إلزامية وكل مادة بتكون عدد ساعاتا شكل
بس بالنسبة للانكليزي، الجامعة عندها مواد انكليزي لتقوية مستوى اللغة عند الطالب، أول ما يفوت في فحص تحديد مستوى للغة
يلي بيحتاج ف بيتسجل بكل فصل ب لفل يلي طلعلو وكل ما ينجح بلفل بينتقل ليلي بعدو وموجود اربع لفلات (0-1-2-3) وهو مجبور يخلصهون ويرفعهون لان في مواد ما بتفتح الا ليكون مخلص اللفلز كلون