طريقة التسجيل للطلاب المستجدين بالتعليم المفتوح

أن شاء الله رح حاول اشرح الموضوع بأبسط طريقة ممكنة وهو بالأصل بسيط بس في طلاب مجرد انها بدها تساوي الشي لاول مرة لازم تكون متوترة وفايتة بالحيط عالعموم اول شي حابب احكي شغلة منشان زملائنا الي انقبلوا بمفاضلة #المعاهد ضروري تنزلوا عالمركز لتعرفوا شو المواد الي عادلولكن ياها ومو شرط اذا رفيقك معو نفس شهادة معهدك يعادلولكن نفس المواد في شي معين بيعتمدوا عليه بموضوع المعادلة ولا تخافوا حتى لو طولت القصة ما بروح عليكن التسجيل لانوا غالبا بيرجع بيتمدد اما بالنسبة لطلاب الي انقبلوا عشهادة البكالوريا ركزوا معي منيح ورح اكتب الموضوع على عدة خطوات:
اولاً بتجهز وراقك منشان التسجيل ولي هني الآتي:
1-صورتين مصدقتين عن شهادة البكالوريا
2-صورة هوية او إخراج قيد للعساكر
3-تسع صور شخصيات 8 منشان التسجيل وفي وحدة رح تلزمكن منشان البطاقة جيب 10 للاحتياط
4-بيان وضع للذكور من شعبة التجنيد وشو ما كانت حالتك خادم جيش مو خادم معفي وحيد مانهن محددين معناها من الكل
5-جماعة الحسومات ورقة عضوية من نقابة المعلمين منشان يكون عندك حسم 20% يعني بتدفع 4000 - وثيقة صادرة عن مكتب شؤون الشهداء بالنسبة لذوي الشهداء ليصير في حسم 50% يعني بتدفع 2500 عالمادة - بالنسبة لحسم العساكر تبع 50% يبدو انو لسا ما أطبق لان مو ذاكرين عنو شي واذا حدا بيسئل وبيتأكد من المركز بكون أفضل
تانياً بعد ما جهزت وراقك بصير دور انك تسحب الاستمارة وتروح تدفع بالبنك الاستمارات لسا ما تفعلت عالاغلب الأحد الصبح تتفعل وما حدا ينزل لانشر بوست انو تفعلت منشان اذا بيتوا بعيد ما ينزل عالفاضي مهم اعتبر انو تفعلت الاستمارات فيك اذا كان عندك طابعة بالبيت او اي مكتبة او مقهى نت بتخلي يسحبلك 4 نسخ وبتعبي فيها بياناتك وكم مادة بدك تنزل هاد الفصل (ناشر بوست بالكروب كاتب فيه لمحة عن المواد فيكن تطلعوا عليه) وإذا في عندك حسميات تحطها بمكانها بالاستمارة بعدين بوجهك عالبنك العقاري السنة الماضية نزلوا قائمة انو كل اختصاص الو فرع معين يدفع فيه وإذا صار هالسنة كمان أكيد بنشرلكن ياها تكرموا وبس دفعت بالبنك رح يعطوك وصل هاد بضموا للوراق الي معك
تالتاً هلأ بقا بعد ما دفعت بوجهك عمركز التعليم المفتوح بالمزة عند المواساة ما بضيع حدا بس تفوت عأيدك اليمين في كشك بتقلوا بدي اضبارة طالب حديث واختصاصك كذا بيعطيك هالاضبارة ضمن مصنف اخضر وطوابع بتحط الطوابع عوحدة من الاستمارات الي سحبتن وبتعبي الاضبارة بمعلومات عنك وبعدها بتحط بهل المصنف الأخضر الاضبارة مع الاستمارات وبقية وراقك وبتسلمهن بالشؤون بيختمولك عالاستمارات كلهن وبياخدوا نسختين منهن
رابعاً هون بقا بتقدم طلب منشان بطاقة الجامعة بقولولك تعا بعد شي عشر تيام خدها وبعدها بوشك عالسكن الجامعي جنب المركز دغري بتفوت لجوا وبتسئل عمستودع الكتب بتعطي استمارة ونسخة تانية من وصل البنك بيعطيك كتب المواد الي مسجل عليهن وبتحمل حالك وبتروح عالبيت مبروك
خامساً فقط للشباب بعد ما ترجع بعد عشر تيام وتستلم البطاقة بتقدم عوثيقة تأجيل بدها شي أسبوعين تقريبا بترجع بتاخدها وبوشك عشعبة التجنيد
اخيراً قبل الفحص بشوي بنزلوا الأرقام الامتحانية هاد الرقم بتكتبوا عبطاقتك وبضل معك لتتخرج ما بيتغير
ملاحظة_صغيرة جماعة الحقوق والدراسات الدبلوماسية ورياض الأطفال نفس الشي بس بدال ما تروح عمركز التعليم المفتوح بتروح عكليتك بتسجل
طلب صغير ساوو تاغات لرفقاتكن ليستفيدوا وما بدي منكن غير دعوة صغيرة عندي تخرج هالسنة موفقين زملائي
عمر حزوري