المفاضلات السورية نصائح عامة وهامة لجميع طلاب البكالوريا

المفاضلات السورية
نظراً لكثرة الأسئلة على الخاص ستجدون الإجابات هنا
( خطة عمل لكل الطلاب ) اقرأوها بتمعّن ..
1. أول مرحلة لح تمرو فيها هي المفاضلة العامة
كل واحد رح يسجل عدد معين من الرغبات بورقة ..
مثلاً :
1. اقتصاد دمشق
2. اقتصاد حلب
3. حقوق دمشق .. إلخ بهالطريقة ..
لح ينزل مفاضلة اسمها المفاضلة الأولى ..
يعني بكون المدني فيها 217 مثلاً بيرتفع لـ 228
لما تطلع النتائج ويمكن أكتر ..
ايمتا بتنزل المفاضلة ؟ بعد التكميلي ..
شوفينا نعمل حالياً ؟
- حالياً بنصح ‫‏الكل‬ يقدم عالتكميلي
مهما كان وكيف ماكان ..
مين بحقلو تكميلي ؟
يلي رسب وبدو يعيد مواد محددة
وبحقلو السنة يلي بعدها دورة وحدة فقط ..
يلي نجح هالسنة أول دورة
إذا فات عالتكميلي نجح أو رسب
ماعاد يحقلو شي السنة الجاية ‫‏انتبهو‬
هام
في قرار بقول :
انو بسبب الأحداث بسورية يسمح لطلاب جامعة حلب مثلاً يداومو بجامعة دمشق وينقلو منها تاني سنة لجامعة دمشق ، طالما في أزمة عم ينزل هاد القرار ويتجدد كل سنة، يعني فيك تستفيد مثلاً ازا مجموعك 190 وتسجل اقتصاد حلب نظامي وتداوم بالشام بدل ماتسجل موازي دمشق بتوفر على حالك بهالطريقة ..
أديش ممكن تطلع المفاضلات ؟
السنة مافي طلعة للعلامات في نزول
ممكن الطب ينزل علامة عن السنة الماضية
ممكن الاقتصاد ينزل 5 والفنون تنزل لحد 15 علامة
كيف عرفت ؟ لأنو في قرارات جديدة لح تساعدكم
-----------------------------------------------------------
مفاضلة الموازي :
نفس الموضوع بس علامات أقل ..
ممكن الهندسة علامتو تكون أقل من العام بدرجتين
ممكن الاعلام علامتو تكون أقل من العام بـ 20 درجة
( كل مانزلت بالتخصص بتفرق أكتر ) ..
ايمتا هي المفاضلة ؟ بعد مفاضلة العام بفترة
اديش بتكلف ؟ من 160 الف للطب والأسنان والصيدلة
ل 110 للهندسات ل 50 ألف للكليات الباقية ..
وفي معاهد 35 الف متل المعلوماتية
وفي معاهد 30 الف متل المحاسبة والإدارة ..
-------------------------------------------------------------
منحة الجامعات الخاصة ، شو هي ؟
هي منحة بعد مفاضلة الموازي بتنزل ..
علاماتها تقريباً متل علامات الموازي، يعني فيك تدرس طب بشري بالجامعة الخاصة على حساب الدولة ، انت ما بتدفع شي، الدولة بتدفع عنك، وفي ناس السنة الماضية علاماتها 130 أدبي طلعلها شريعة ببلاش بجامعة خاصة يعني انا بنصح كل الطلاب يقدمو عليها اذا ما طلعلون شي بالعام والموازي ..
------------------------------------------------------------
في منح خارجية :
عن طريق الحكومة : بتروح على وزارة التعليم العالي بتقلن بدي منحة بعد مفاضلة الموازي بتنزل ، بسفروك هنن على شي دولة من الدول البقيانين ، مثلاً روسيا ، الصين ، أحياناً مصر ..
في طلاب السنة الماضية مجموعها 210
طلعلها منحة طب بشري ..
في منح مو عن طريق الدولة عن طريق النت :
بس بدك يكون مستواك بالانكليزية (ممتاز)
ممكن يطلعلك كل شي بدك ياه مهما كانت علاماتك
-------------------------------------------------------------
شوفي غير هدول في حال ماطلعلي شي ؟
في الخيار التالت هو التعليم المفتوح ..
فيه : اعلام - حقوق - علاقات دبلوماسية - ترجمة - رياض أطفال - اقتصاد للعلمي وللأدبي وللتجاري ..
يعني مافي طب عالمفتوح وهندسات ..
هاد رسومو شي 50 بالسنة تقريباً لكل التخصصات
متل الجامعة العادية تماماً بس الدوام جمعة وسبت
معترف فيه، الشهادة صادرة من جامعات الدولة
‫#‏لاتلحقو_الإشاعات_وكلام_العوام‬
معدلاتو من 110 للأدبي و 120 للعلمي وطالع ..
(تقريباً مافي طالب إلا وبينقبل بالمفتوح )
-------------------------------------------------------------
شوفي غير هيك ؟
الجامعة الافتراضية دوامها عالنت متل اليوتيوب
بتحضر بالفيديو اون لاين وبتقدم وظيفة بالبريد تبع الجامعة
وآخر شي بتعمل فحص ، ميزتها انو يلي بدو يسافر عالدول هي : السعودية ، الإمارات ، الكويت ، لبنان ، الأردن ، تركيا ، مصر وكل المحافظات السورية بلاقي مركز بقدم فيه امتحانات يعني مابيتعطل وهي حلوة للسوري يلي مقيم خارج سورية وفيها هندسة معلوماتية ، اقتصاد ، اعلام ، حقوق فقط بتكلف سنوياً شي 110 الف تقريباً وهي حكومية مو خاص ..
--------------------------------------------------------------
معهد كفتارو والفتح (معهد الشام العالي)
هاد معهد شرعي بقدم شهادة جامعية نظامية وبيقبل كل المعدلات لو 50% فما فوق متل المفتوح والافتراضية ، بس بدو دوام، فيو كل الاختصاصات تبع الادبي تقريباً ، واقتصاد وحقوق واعلام وشريعة واداب الخ ..
قسطو بيبلش من 50 الف للشريعة وبيوصل ل 100 الف للحقوق والاعلام و 120 للاقتصاد (بيقبل علمي وادبي وتجاري ) ..
--------------------------------------------------------------
بالنهاية الطالب بالعلمي غالباً عم يطلعلو فروع بالعام والموازي مهما كان معدلو عدم ، اما الادبي ازا كان تحت 150 ماعم يطلعلو شي بالعام والموازي ، بنصحكم تقدمو عالمنح تبع الجامعات الخاصة بعد ماتخلوص مفاضلة الموازي ، المفتوح بيقبل الكل ، والافتراضية ومعهد الشام والجامعات الخاصة ..
نستنتج : مافي حدا مابيطلعلو جامعة لو كان معدلو 110 أدبي و 120 علمي ، ممكن يسجل جامعة بقسط بيتراوح من 50 ل 100 الف بالسنة مو أكتر ..
- منقول -
بالتوفيق للجميع ..